Zatoz gurekin lan egitera!
HRS4R
Administrarietatik hasi eta kualifikazio eta espezializazio handiko nazioarteko ikertzaileetara arte, BCAMen lan egiten duten pertsonak dira Zentroaren motorra. Kultura anitzeko ingurune batean egonda, BCAMek ikerketarako giro egokia eskaintzen du eta nazioarteko eta diziplinarteko talde oso lanzaleen sorrera sustatzen du.
Ikertzaileentzako Giza Baliabideetako Estrategia (HRS4R)
Europako Batzordeak Europako Ikertzaileen Karta eta Ikertzaileak Kontratatzeko Jokabide Kodea onartu ditu, ikertzaileentzat eta baita enplegatzaile eta sektore publiko zein pribatuko finantzatzaileentzat ere. Bi dokumentuak Europar Batasuneko politiken funtsezko elementu bihurtu dira, izan ere, ikerketa karrera erakargarri egiteko eta Europako hazkunde ekonomikoa eta enplegua sustatzeko balio dute.
Zehazki, Ikertzaileen Europako Kartak ikertzaileen eta beren enplegatzaileen eginkizunak, erantzukizunak eta eskubideak zehazten ditu. Helburua da alderdi hauen arteko harremanak emaitza arrakastatsuak ekartzea, ezaguera sortu, eskualdatu eta modu partekatuan erabiltzeko, bai eta ikertzaileen hasiera-hasieratiko garapen profesionala bermatzeko ere.
Era berean, Ikertzaileak Kontratatzeko Jokabide Kodea kontratazioak hobetzeko xedearekin egin zen, hautaketa prozedura bidezkoak eta gardenak ziurtatzeko. Ikertzaileen merezimendua neurtzeko orduan, argitalpen kopurua aztertzeaz gain, ebaluazio irizpideen multzo zabalagoa erabili behar da, hala nola hezkuntza eta irakaskuntza lanak, ikuskapen lanak, taldeko lana, ezaguera transferentzia, kudeaketa eta herritarren kontzientziazio jarduerak.
Ikerketa erakundeei Karta eta Kode hauen printzipioetara egokitzen laguntzeko, Batzordeak prozedura bat ezarri du eta, horri esker, printzipio horiek txertatu nahi dituzten erakundeek beren Giza Baliabideetako Estrategia propioa diseina dezakete.
Prozedurak bost urrats ditu:
- Barne analisi zorrotz bat prestatzea.
- Erakundearen estrategia erakundearen webgunean argitaratzea eta Karta eta Kodea mantendu eta hobetuz joatea.
- Batzordeak estrategia ebaluatu eta onartzea.
- Erakundeak prozesua aplikatu eta etengabeko moduan ebaluatzea.
- Eta azkenik, Batzordeak estrategiaren eta haren ezarpenaren kanpoko ebaluazioa egitea, lau urtez behin, prozesua abian jartzen denetik aurrera.
Estrategia honen definizioa eta ezarpena Batzordearekin eta talde pilotuaren kide diren beste erakunde batzuekin lankidetzan egingo dira, barne hartuta adierazpen hau dagoeneko lortu duten erakundeak eta hura lortzeko prozesuan daudenak ere, hori baita jardunbide egokiak partekatzeko foro egokiena.
HRS4R BCAMen
BCAMek bere konpromisoa sinatu zuen, Europako Ikertzaileen Kartako eta Ikertzaileak Kontratatzeko Jokabide Kodeko (C&C) 40 printzipioak onartuta, 2008ko abenduan.
2015 hasieran, BCAMek giza baliabideen kudeaketarekiko konpromisoan pauso bat urrunago joatea erabaki zuen eta Europako Batasunak sustatzen duen “Ikertzaileentzako Giza Baliabideetako Estrategia (HRS4R)” barne analisiaren prozesua abian jarri zuen. HRS4R mekanismoak Europako Ikertzaileen Karta eta Ikertzaileak Kontratatzeko Jokabide Kodea (C&C) praktikara eramateko balio du.
Prozesu horren emaitza izan ziren 2016ko Barne Analisia eta Ekintza Plana. Horren ondorioz, 2016ko ekainean, BCAMek “Ikerketaren arloko giza baliabideen bikaintasuna” logotipoa eta errekonozimendua jaso zituen.
2018ko uztailean, “Ikerketaren arloko giza baliabideen bikaintasuna” jaso eta bi urte beranduago, BCAMek aurreko Ekintza Plana berrikusteko eta hobetzeko autoebaluazio prozesu bat garatu zuen. Horretarako, 2016ko Ekintza Planean definitutako ekintza bakoitzaren egoera aztertu zen (BCAMen Giza Baliabideetako Ekintza Planaren 2018ko Berrikusketa) eta inkesta bat egin zitzaien langile guztiei. Horren ondorioz, BCAMek gabezien analisi bat egin du eta Barne Berrikusketa dokumentu bat prestatu du.
Gaur egun, BCAMek printzipioetan lan egiten jarraitzen du eta Kartarekiko, Kodearekiko eta HRS4Rarekiko konpromisoa mantentzen du datozen urteetara begira, Zentroaren Estrategiaren esparru barruan. Helburu horrekin eta aurreko Barne Berrikusketan lortutako informazioarekin, hurrengo 3 urteetarako (2018-2021) Giza Baliabideetako Estrategia eta Ekintza Plana garatu zen. 2021ean, BCAMek autoebaluazio prozesu berri bat egin zuen (2020ko Gabezien Analisia), 2021-2024 Ekintza Plana Hobetua prestatzeko.
Merezimenduen araberako ikertzaileen kontratazio ireki eta gardena (OTM-R)
Merezimenduen araberako kontratazio ireki eta gardena (OTM-R, ingelesez) Europako Ikertzaileen Kartaren oinarri nagusietako bat da, are gehiago Ikertzaileak Kontratatzeko Jokabide Kodearen kasuan. OTM-R kontratazioa onuragarria da ikertzaileentzat, erakundeentzat eta herrialdeko ikerketa sistema osoarentzat. Zehazki, OTM-R motako kontratazioak ikerketa karrerak erakargarriago egiten ditu, hautagai guztien aukera berdintasuna bermatzen du eta mugikortasuna errazten du. Oro har, ikerketaren arloko inbertsioen kostu-eraginkortasuna areagotu dezake.
BCAMek bere lehenengo OMT kontrol zerrenda aztertu eta osatu zuen, OTM-R kontratazioaren gomendio eta printzipioak txertatu zituen bere barne kontratazio politiketan. Honela, OTM-R kontrol zerrenda erabilita egiten dugun kontratazio prozesuaren azterketa sistematikoari esker, BCAMek bere barne analisia hobetu du eta OTM-R politika hobetu bat garatu du.