BCAMek MATH4SPORTS proiektuko lehen talde bilera egin du

• Talde kiroletarako metodo estatistikoei eta lesioen prebentzioari buruzko lantaldearen lehenengo bilerak zenbait erakunde akademikoren eta Europako futbol klub profesionalen ordezkarien parte hartzea izan zuen

Matematika Aplikatuen Euskal Zentroak - BCAM antolatu zuen metodo estatistikoei eta lesioen prebentzioari buruzko lantaldearen lehenengo bilera, Bilboko zentroan, pasa den irailaren 25 eta 26an. Ekitaldia ez zen publikoa izan eta aurrez aurre egin zen, Bizkaiko Probintzia Kontseiluaren eta Eskualde Garapeneko Europako Funtsaren laguntza ekonomikoarekin, MATH4SPORTS: Kirolaren industriarako modelatze matematikoa: Osasuna eta errendimendua (6/2022-6/2024) proiektuaren esparru barruan. Zenbait erakunde akademikoko eta futbol klubetako ordezkarik parte hartu zuten ekitaldian.

Ekitaldiaren bi egunetan zehar, parte hartzaileek talde kirolekin lotutako hainbat gai jorratu zituzten, hala nola trebakuntza tradizionalaren eta datuen analisi aurreratuaren integrazioa, wearable motako teknologia eta gauzen Interneta kirolen arloan, jokalarien entrenamendu kargaren eta nekearen monitorizazioa eta kirol lesioak prebenitzeko estrategiak. Bi eguneko ekitaldia "Estatistikoki hobetutako ikasketa: kirol analisirako eta kirol medikuntzarako aukera berriak” izeneko Luxenburgoko Unibertsitateko Christophe Ley irakaslearen mintegiarekin hasi zen astelehenean. Egun berean, Alex Gerharzek (Borussia Dortmund taldeko Datuen Zientzialaria) bere klubak datuen zientzia aplikatzeko baliatzen dituen estrategiak azaldu zituen. Bileraren bigarren eguna Athletic Cluben Lezamako instalazioetan egin zen. Jon Larruskain (Athletic Clubeko Sports Scientist) izan zen bileraren anfitrioia eta, bertan, PSV Eindhoven taldeko Ruud Van Elkek, SL Benfica-ko Catarina Bajancak, Arsenal FCko Mikhail Zhilkinek eta Borussia Dortmund-eko Alex Gerharzek beren kluben erronka nagusiak partekatu zituzten.

Lankidetza aberasgarria

Ekitaldiak ordezkari hauen parte hartzea izan zuen: Lore Zumeta, Jone Rentería eta Mikel Pérez (Matematika Aplikatuen Euskal Zentroa - BCAM), Dae-Jin Lee (IE University), Andreas Bender (Munichko Ludwig Maximilian Unibertsitatea), Christophe Ley eta Sofia Loizidou (Luxenburgoko Unibertsitatea) eta Andreas Gröll (Dortmundeko Unibertsitate teknikoa). Futbol talde profesionalen aldetik, ordezkari hauek parte hartu zuten ekitaldian: Mikhail Zilikin (Arsenal FCren lehen taldeko Data Scientists), Alex Gerharz (Borussia Dortmunden lehen taldea), Catarina Bajanca (SL Benficako kirol zientzialaria), Ruud Van Elk (Head of Sports Science and Analytics PSV Eindhoven taldean) eta Jon Larruskain (Sports Scientist Athletic Cluben).

“Ikuspegi gurutzaketa paregabea izan zen! Bilerak bi mundu batu zituen, akademiarena eta Europako futbol profesionalarena, aurrekaririk ez duen ezaguera trukea sustatuz”, esan du Dae-Jin Leek.