Bilbon antolatu da, lehenengo aldiz, Euskampus Bordeaux Eguna 2023

• Euskampus Bordeaux Eguna pasa den azaroaren 13an eta 14an egin zen Euskal Herriko Unibertsitatean (UPV/EHU)

Bilboko Euskal Herriko Unibertsitateko (UPV/EHU) Ingeniaritza Eskolak antolatu du aurtengo Euskampus Bordeaux Eguna. Aurreko urteetan bezala, UPV/EHU, Bordeleko Unibertsitatea, DIPC eta Tecnalia lankidetzan aritu dira.

BCAM (Basque Center of Applied Mathematics) bertan izan zen, aurtengo edizioko azaroaren 14an, David Pardo (BCAM – UPV/EHU Ikerbasque Research Professor) eta Vincenzo Navaren (BCAM researcher) parte hartzearekin. Bi ikertzaile horiek izan ziren JRL-A2I laborategiaren (Joint Research Lab on Applied Intelligence) inaugurazioa aurkeztearen arduradunak. Biek dihardute MATHDES (Mathematical Design, Modelling and Simulations) ikerketa ildoan. Lan horretan, Javier del Serren (Tecnalia eta UPV/EHU) laguntza ere izan zuten.

Euskampus Bordeaux Eguna hilaren 13an hasi zen, irekitze instituzionalarekin. Bi egun horietan zehar, bisitariek hainbat workshop, jarduera eta partaidetzarako lantegi izan zituzten eskura, Ardatz Atlantikoaren esparruko trantsizioek dakartzaten erronken ikuspegi partekatua sortzeko, hartara kostalde euskal-akitaniarraren balioa azpimarratuta.

Aurreko edizioetan bezala, ekitaldiak oso bilkurak eta baterako sorkuntzarako lantegiak antolatu zituen, bisitarien arteko topaketa informalekin batera. Programa horren helburua gizarte interakzio kulturaniztuna, eleaniztuna eta diziplina artekoa sustatzea izan zen. 200 pertsona baino gehiago bertaratu ziren elkarren arteko harreman pertsonal eta profesionalak ezarri eta sendotzera. Gainera, aurten, ekitaldian modu aktiboan parte hartzeko aukera eskaini zitzaien 40 ikasleri (gradu, master eta doktorego ikasleak).

Aipagarriak dira ere Euskalduna Jauregira egindako bisita gidatua, Gaetano Donizettiren “L’elisir d’amore” operaren lehen ekitaldiaz gozatzeko, eta Zorrozaurre auzoaren bisita. Parte hartzaileek etengabe eraldatzen ari den eta hiria berroneratzeko eragiketa handia bizi duen Bilboko Zorrozaurre auzoa bertatik bertara ezagutzeko aukera izan zuten.

Aurtengo edizioan, “A bordo del Campus Euskampus Bordeaux” izeneko jarduera bat antolatu zen, 15 pertsonari Euskampus erakundeen arteko lankidetzaren esparruan garatzen ari diren proiektua edo ekimena aurkezteko balio izan ziena. Pertsona horiek 173 segundo izan zituzten (Bilbo eta Bordele arteko distantzia itsas miliatan) beren ideiak azaltzeko. Halaber, sei Lankidetzako Mugaz Haraindiko Laborategien (LTC) aurtengo lorpenetan arreta jarri ondoren, hautatu berri den LTCa iragarri zen eta LTC Sare berria ezagutzera eman zen.

LTC Sarea LTC laborategiek osatutako sare egituratu eta koordinatua da. Nazioz haraindiko ikertzaileen komunitate jasangarria da eta nazioarteko ingurunean sustatzea eta LTCen inpaktua areagotzea ditu helburu. BCAM laborategi sare berri honen kide da ere. Basque Center of Applied Mathematics zentroak erabateko  inplikazioa hartu du TRANSMATH laborategiarekin, eta zazpi ikertzailek osatutako taldea du LTC sareko instalazio horretan. Laborategi hau aliantza estrategikoa da Euskal Herriko Unibertsitatearen (UPV/EHU) eta Bordeleko Unibertsitatearen (UBx) artean eta goi hezkuntza, ikerketa eta berrikuntza sustatzeko ekosistema partekatu bat eraikitzen laguntzen du.